«Mirum-фэст» (27 жніўня 2022г.)

Адзел культуры і па справах моладзі Карэліцкага раённага выканаўчага камітэта паведамляе, што 27 жніўня 2022 года ў г.п. Мір Карэліцкага раёна адбудзецца рэгіянальны гістарычны фестываль “Mirum-фэст”, прысвечаны году гістарычнай памяці.

Наша Карэліччына, як і ўся Беларусь, мае глыбокія культурныя карані і традыцыі: у песнях, святах і абрадах, народных паданнях і казках, танцах – усё гэта робіць нас адметнымі сярод сусветнай шматнацыянальнасці. І кожная з’ява мінулых стагоддзяў – ці то традыцыі аздаблення народнага адзення, габеленаў, ці то святкаванне старадаўніх святаў, ці то знакамітая гісторыя Вялікага княства Літоўскага, Рэчы Паспалітай – усё мае неацэнны вопыт і нашу ўнікальную адметнасць. Сярод гэтага пераліку ёсць адна цікавая – гэта “Мір”, увогуле ўвесь пасёлак – наша знакамітае на ўвесь свет мястэчка.

Існуе цікавае меркаванне: назва Мір паходзіць ад лацінскага слова mirum, што азначае “цуд”. Дык, магчыма, так мястэчка называлі менавіта за тое, што ад самага пачатку ў ім і вакол яго адбываліся незвычайныя цуды?

На самой справе, для невялікага населенага пункта тут знаходзіцца даволі вялікая колькасць цудаў. Па першае: у Міры знаходзіцца шмат гістарычных і архітэктурных каштоўнасцей, адна з якіх гатычная фартэцыя XVI ст. – Мірскі замак – адна з тых славутасцяў пасёлка, якая не мае патрэбы ў прадстаўленні. Другі момант – гэта непаўторныя тры стагоддзі, калі Мірскім замкам і самім мястэчкам валодалі найбуйнейшыя, найвядомейшыя ў Беларусі адзінаццаць Радзівілаў. Трэці момант, які забяспечыў сусветную вядомасць Міру, – Мірская ешыва, адна са знакамітых ешыў першай паловы ХХ ст., дзе побач з грамадзянамі Расійскай імперыі, а пасля Польшчы навучаліся студэнты з самых розных краін свету. Яшчэ адметная з’ява ў шматнацыянальнай гісторыі пасёлка гэта тое, што некалі Мір лічыўся шматнацыянальным мястэчкам – гэта важна і цікава. Цяпер мястэчка –паняцце абстрактнае, а па сутнасці, усе беларускія мястэчкі яшчэ пяцьсот гадоў таму сталі першымі свабоднымі эканамічнымі зонамі. Гэта значыць, яшчэ тады стала зразумела, што для таго, каб скарбніца папаўнялася грашыма і краіна жыла стабільна, неабходна даць свабоду прадпрымальнікам. І для гэтага было зроблена наступнае: з’явіліся месцы, дзе можна было праводзіць сур’ёзныя кірмашы. Мірскія кірмашы былі не толькі месцам, дзе адбываліся купля-продаж тавару, але і падзеяй, дзе просты народ меў магчымасць “адвесці” ў розных забавах, танцах, выступленнях артыстаў. Кірмашы мінулых стагоддзяў карысталіся вялікай папулярнасцю і ўяўлялі сабой святочны гандаль. Прымяркоўваліся такія кірмашы да дат хрысціянскага календара, адкуль і атрымалі назвы Дзмітраўскі і Міколаўскі.

Фестываль “Mirum-фэст” разлічаны на “ўсіх людзей з бліжніх і дальніх вёсак і зямель”, каб умацаваць дзелавыя і сяброўскія зносіны, набыць тавар і ўражанні на “Мікалаеўскім кірмашы”, пабачыць Мірскія мясціны, задаволіць свае матэрыяльныя і духоўны патрэбы і, ў вогуле, на тых хто хоча зазірнуць у рэха Радзівілаўскай гісторыіі.

Упершыню на фестывалі будуць працаваць тры гістарычныя пляцоўкі, дзе гісторыя і сучаснасць адкрыюць таямніцы нашага мястэчка:
Пляцоўка “Рэха даўніны” (тэрыторыя Мірскага замка – цэнтральнае месца фестываля). У рамках фестываля тры волаты зямлі мірскай, Радзівілы – Сіротка, Рыбанька і Пане Каханку, здзейсняць вялікае гістарычнае свята “Рэха даўніны”, дзе сустрэнуцца знакамітыя уладары беларускіх фартэцый. Свята пачнецца святочным шэсцем “Госці Радзівілаў”, прадстаўленнем гістарычных падвор’яў замкаў. Працягнецца конкурснай праграммай “Мая легенда”, дзе знакамітыя ўладары прадэманструюць свае легенды і паданні, якімі “дыхаюць” іх замкі, старажытным шляхецкім балем, у якім змогуць прыняць удзел усе госці фэсту. Завершыцца фестываль маштабным факельным шэсцем з фаер-шоу.

Пляцоўка “Мікалаеўскі кірмаш” . Пляцоўка кірмашу будзе не толькі месцам, дзе адбудзецца выстаўка рамеснікаў, купля-продаж тавару, але і падзеяй, дзе просты народ будзе мець магчымасць “адвесці душу” ў розных забавах, танцах, выступленнях артыстаў. Як і кірмаш мінулых стагоддзяў, Мікалаеўскі будзе шматнацыянальным. Будуць працаваць яўрэйскі рэстаран на адкрытым паветры “Шэпшаль” 1, беларуская каварня “У Кузьміча”2, польскі магазін “Вспулдэльня” 3, фотамайстэрня Гольдзіна 4.

На “мікалаеўскім кірмашы” будуць прадстаўлены тэматычныя падвор’і сельскагаспадарчых прадпрыемстваў і арганізацый раёна.

Пляцоўка для дзяцей і моладзі “Горад пяці вуліц”(вул. Чырвонаармейская, ніжняя стаянка).

На дадзенай пляцоўцы будзе працаваць фуд-корт, зона сямейнага адпачынку, атракцыёны. Для падлеткаў і моладзі адбудзецца фотаквэст “Горад пяці вуліц” (назва аднаіменнай главы з кнігі Рухомы Шайн “Усё для боса”, прысвечанай мястэчку Мір).

Будзе працаваць фотазона на калёсах “Красавянка”5.

Пляцоўка “Горад майстроў”(па вуліцы чырвонаармейскай ад пляцоўкі “Горад пяці вуліц” да пляцоўкі “Мікалаеўскі кірмаш”) На пляцоўцы будут размешчаны майстры народных промыслаў. Пройдуць майстар-класы па ганчарству і вырабу шпалераў (якімі ў мінулыя часы славілася наша Карэліччына), таксама па сыраварэнню, вырабу хлеба, шкловыдзіманню, коўцы, ткацтву, вышыўцы, саломапляценню, разьбе па дрэве і інш.

У сувязі з вышэйсказаным, просім Вас разглядзець магчымасць удзелу ў фестывалі.

Заезд і растаноўка удзельнікаў адбудзецца 27 жніўня 2022 г. з 9:00 да 10:30.

Інструкцыя аб фестывалі, схема растаноўкі будзе адпраўлена паўторна.

Кантактны тэлефон: 8(01596)71086, м.т. +375295725928 Гароднік Наталля Мікалаеўна, +375(29) 8427221 Басюк Аксана Ўладзіміраўна